Boli motor

Lame bonar den tak menulis sobab banyak kenduri maso rayo cino tu hari. Omak den pun buek kenduri rayo cino pertamo. Dio mintak den boli barang keperluan untuk kenduri tu. konolah den poei pasar untuk dapekkan keperluan. Banggo jugaklah den pasal den dibori kepercayaan oleh omak den boli barang, bukan itu yang den nak cerito. dulu kalau rayo cinoni mengelupur orang melayu nak dapekkan barang, sobab tutupjo kodai cino orang melayu tak dapek nak bebelanjo tapi sekarang dah banyak kodai melayu dan india di pokan. Dapeklah den boli barang tersobut untuk kenduri. Ini dinamokan kemajuan dan perubahan sikap orang kito terhadap perkembangan ekonomi.  Orang melayu sekarang ni dah mula berjinak dengan perniagaan, tak kirolah apa bentuk perniagaan yang diusahakan. pokok utama eii dah mulo menjadi bisnesman. Dalam islam mengatakan 9 dari 10 rezeki dari perniagaan. tapi ape yang den hibakan mereka pulak menanguk di air keruh. Janganlah buek macam itu untung tak seberapo nanti pelangan yang lari rugi berpanjangan..........

Kenduri yang omak den buek tu hari pasal nak mengumpukkan ghoto(harta) kek adik beradik dio. Tanah pesako tu tak beruntukkan dari zaman jopun sampai nia, Tanahtu pun bukanlah lebar bonar tapi setiap geran tu ado namo dio adik beradik bolah uwan den. Pembahagiantu berjalan dalam suasano kekeluargaan dan baik tak ado yang beramok atau perasaan tak pueh hati. Alhamdulillah Datuk Padukopun sonang hati....... Omakden pun koba kek den dio tak ade masalah dengan pembahagian ghoto tu. Cumo ade akak sedaro den dio menolak tak hendak tapi bilo selosai mulolah mereto-reto tak setuju. Tapi tak kesahlah sobab kalau dio hendak leh ubuh namo laei.....

Den dah ambik moto yang den kobakan tu...... Adik betino den koba den ni age crisis ko, den kobar den cumo berajat dari mudo laeii.... Dio diam jo. Akak kau tak kobar apopun cumo dio risau bilo den kuar naik moto sobab bosar takut jatuh. Den dah tak bawak moto dokek 13 tahun dulu kok bawakpun motor den kocikjo setakat 250cc yang ponah den bawak.Moto denni kaler merah sahlah abah den ranggi.........

Poning kepalo

Apo khabar kawan-kawan yang sentiaso den kasihi, dah lamo den tak menulih sobab kepalo den sakit kono hujan. Kono hujan semaso Kem Kepimpinan pelajar sekolah yang mano den di panggil menjadi fasi. Dua hari do malam den terlibat. Maso mudo dulu den ni gomar poei ekpedisi sobab denni ponah jadi jurulatih rekreasi kebangsaan dibawah Jabatan Belia dan sukan , tapi itu citor lamo maso umur 20 tahun. hujan ko paneh ko den sobatjo... jarang dapek sakit. Tenago tongah banyak agak eiii. Sekarangni bukan kono hujan berembun pun domam.


Dulu den gomar ado sobab eii, den ponah bawak satu gang dari Key Ell, budak kilang jadi ramai pompuan. Ramai gang ni datang dengan couple. Dah tontu jantan ngan betino. Kawan-kawan den panggil den ni sweeper sobab den boleh bawak rucksack (bag galas) 50 liter selambojo 4 buah. Kiri, kanan, dopan dan belakang.

Kalau buek pendakian ke gunung den akan duduk belakang, kojo den pastikan tak ado pesorto yang tinggal. Nak jadi citer couple jantan ni... selalu eiii excited sikit.Prinsip guideni kalau dio orang tanyo jauh laei ke bang. Kito orang akan jawab tak jauh cuma sebatang rokok, sampailah. Bebudak jantan tu apo laei bokojarlah naik tinggallah awek dio orang sobab bebudak betinotu dah tak larat. Apo laei... denlah gembalokan. Sekojap krem kakilah den tolong urutkan , sekojap somput nafehlah den tolong urutkan. tang tu... den gomartu.... Den mudo ngasotu. Kalau tak larat den poluk bawak berjalan. Mulo eii tu malulah den tariklah pakai kayu. susah pakai kayu pakai tangan kesudahan eii den poluk bawak ko ateh sobab dah tak larat laeii....... Sahlah lopeh tu... awek dio orang dok lepak dalam kem den dan kawan-kawan guide den yang lain.


Adolah kawan guide den yang kawin dengan posorto yang dibawak eii...... ompeklah anak eii sekarangni. tapi itu citor lamo. Sekarangni hujanjo dah tak larat, nak domamlah, sakit kepalolah macam-macam laeiii masalah. 

Citor pasal motor, hari Khamis ni dio orang nak hantar motor den kek umah, sobab dio orang tak bagi den ambik sobab takut den tak biaso ngan motor bosar takut jadi apo-apo hal pulak takko nayo kato dio oranglah. Den ikutjo apo yang dio orang pikirkan yang elok den ikut.

Tadi den poei sign agrement kek Nuar, Nuar cakap esok denleh lah bayar siap[ ngan rogo jaket laei.... den golak jo. Posan eii jangan lupo masukkan lam fb, Dio nak nengok motortu..  Balik den call akak kau dio suruh boli susu baby den, den catatkan lam buku catatan takut lupo. Lopehtu den jumpo Zul kawan den yang tolong carikan motortu sobab kobotulan dio ado kek pokan tompek den sign agrement tu. Sembang punyo sembang sampai kul onam. Sembang pasal bisnes dio, den pun nak tumpang sekaki. Dioni bisnes entertainment equipment. Den talefonlah Bang Teh kok ado lubang bisnes sobab dioni baik ngan montori KPKK. Monolah tau kok ado joki............ Raso eiii cukuplah dulu harini kok ado maso den tulis laeiii. Terima kisih pada follower den walaupun tak ramai.

Tengok Motor

Malam tadi den tak sompek nak nulis, den poie tengok motor bosar yang den idamkantu. Den bawaklah akak kau sekali semuo anak-anak den poie. Sobab kok nak pakai moto bosar konolah ikat porut sikit bukan den jo tapi budget family pun kono potong sikit. Pueh den mujuk akak kau pasal nak boli motortu. Sayang punyo pasal mengalahlah jua akak kau kek den.  Anak nombor 3 den jantan, baru darjah tigo bilo tengok motortu terus suruh den boli. Dio ingat dapaek gak eiii 5, 6 ribu. Puluh ribu rogo eiii. Bilo test rider menjoling orang kek dopan klinik Nasir dan dokek kodai makan tu. Tak tahulah bonci ko atau terpogun nengok eiii........

Cam biaso pagini den call Nuar kek Bank Rakyat, Pucat den bilo dio kato lum tengok laei den punyo akaun. Apa tak eii... den dah bayar cengkoram tando jadi. Den takut kok tak dapek buek pinjaman jawab eii loncor cengkoram yang den dah bayar. Balik dari tompek kojo Nuar call den. Pinjaman ok. Peh, lapang dado den! hutang bertampok jangan kiro  janji den dapek makai.

Den pun poning kepalo kek tompek kojo, camana nak dapekkan sain pengosahan slip gaji den. Haji dah koba syarat nak buek pinjaman, baki mesti ado 60 % selopeh potongan. Den poei jugaklah mintak pengesahan, Den kobalah kek dio den nak boli motor, Dio nasihatkan den jangan boli motor untuk berulang ko tompek kojo, dio tanyo den punyo kereto kuek ko makan minyak. Den koba kuek tak kuek 2400cc biasolah.Macam-macam lah dia nasihatkan den jangan boli moto tapi bolilah kelisako cam dio guno untuk berulang ko tompek kojo.Pakai moto bosarlah risiko eiii.. Den diam jo.... Kok dio jumpo den Senayan nanti tontu dio tanyo berapo rogo motor kau boli. Den jawablah 5...6. Kalau dio tengok sok kok bosar moto tu takkan dapek 5...6  barulah den jawab 56 ribu tapi rogo taklah sampai macamtu.

Den tunggu lulus pinjaman, den pakailah........ Sampailah hajat den selamo ni....... Alhamdulillah.

Malamni den terlibat dengan program kursus bebudak sekolah. Den jadi salah sorang fasi,jadual den malamni untuk ice  breaking. Tapi den tak kisah sobab den cuma ikutjo. Ketua fasi yang sediokan segalo bontuk LDK yang nak dijalankan. Den poei kem tu lopeh maghrib..........

Harini hujan, syukur, den tanam pisang kek belakang umah den, dah dua minggu tak hujan naik kuning daun anak pisang yang den tanam. Hujan tu dapeklah bajo tu sorap dalam tanah,suburlah nanti pisang tu.... Bilo sobut tontang bajo den teringat kek orang motong gotah. Rogo tongah mahalni, kotopikanlah sikit duit boli bajo, bantai motong jo bajo tak nak ubuh mano nak ado gotah. Dio tongah elok batang eii tu jagolah dengan baik Jangan lupo ............ubuh bajo. Kito jumpo laeiii sobab den nak poei kem program budak sekolah yang panggil den tu.........

Jumpa kawan

Malam tadi den jumpo kawan sekolah den Zulkefli bin Rawi, dioni bukan setakat kawan sekolah malah sekampung. Maso sekolah dulu den memang kamcing. Pencapaian akademik eii.. taklah seberapo tapi masuklah kelompok samo dengan den cumo den bernasib baikjo lulus. Apo komen eii bilo gagal pekso dio koba   disobabkan den gomar bukak kasut maso dalam kelas, bau stokin den yang bangar menyobabkan otak eii. jem tak dapat menerimo apo yang diajar dek cikgu.

Tapi dio ado kolobihan sobab dio pandai main gitar, jadi ramailah minah yang suko, den sampai sekarang jaki tengok dio sampai sekarangpun ramai minah yang gomar kek dio. Joki koba eii kek den. Den sahkan nak dapek nak bercakap dengan minah sekolah den dulu pun den takut walaupun roman den nampak ganeh. Bukan tak hensem rupo macam bai (sikh) Den ngadulah kek dio den berajat bona nak pakai superbike, Dioni ramai contact kek Key El. Den harap adolah motortu, kul 8,00 malam ni dio call dah ado satu superbike yang den idamkan tu CBR 900 cc. Bodobar den dongar mano pulak den nak cokau duit , jawab eii abah tiri den  Bank Rakyat. Sok den nak call Anuar Baharin kawan den kek Bank Rakyat leh tak den nak overlaping. kok dapek sahlah Abah Den Ranggi. Akak kau kombunglah porut ngonangkan ragam abang kauni..........


Den ni kelompok bertuah jo....... Pandai bonar taklah tapi belajar 3 buah universiti. Sobutjolah universiti yang terkonal kek kolumpotu, somo den masuk um,ukm dan upm, kiro taraf sifulah. Denni nak buek phd dah tua, belanjo pulak tinggi. Banggo jugaklah omak den, sobab semua gambar konvo den ditayang kek dinding, Macam rumah cino kato abah den. Den tak kiro lantaklah...........

Den ni duduk kampung, bilo dongar rogo gotah tinggi raso nak motong tapi kobun pulak tak ado. Nak mintak kek orang peduo tak ado yang percayo den buleh motong. Lot pun dah tak ado, ponoh. Den cubo pujuk omak den bori den motong gotah belakang umah eii. Sapo tak nak dokek RM 7.00 sekilo. Atuk den masa bolum jopun masuk lu koba rogo gotah ngasotu dokek  5 ringgit sekati. Berentilah atuk den jadi cikgu. Gaji cikgu maso tu baru 15 ringgit. Den takut peristiwo yang samo akan berlaku kok ramai kakitangan kerajaan boronti kojo sobab rogo gotah tinggi. Den ontahlah, tak ondak pulak den nak ikut cara atok den. sobab kok jatuh pulak rogo mahu melopong nanti. Cumo satulah den nak posan dapek duittu, sikit makan sikit simpan manolah tahu kok jatuh rogo adojo sikit simpanan.

Orang kampung sekarang ni dah kayo, kalau den minum kek kodai bangunjo dah siap bayar. Alhamdulillah................Tumpang tuah kek orang motong gotah. Den raso kito boronti dulu sobab dah lapar pulak. Sok kok ado maso den sambung laeii..............

Abah den ranggi

Hari ni den nak bagi tahu kenapo den pilih namo abah den ranggi, Bukan den minat bonar dengan pelakon tu.. Ahmad Tarmimi, tapi den minat kek moto godang eii tu. Den berajat bonar nak pakai dalam tempoh umur den 50 tahun itupun kok sompek, tapi Ustad Roy koba kok umur 50 tahun takut tupang moto kok tak terdayo. Walau macammanopun itu den punyo motivasi konolah berusoho sikit nyimpan duit kalau tak jumpo moto godang duk rosokjelah...

Bila den mulo belajar nak buek bolg, den tanya akak kau nak ubuh namo apo spontanjo akak kau koba abah den ranggi. Tu yang den punyo blog, den namokan camtu. Den bukan ranggi tapi rugged adalah sobab kalau maso kocik tongah bujang teruno jangan sobutlah muzik bluesni.... kau sobutjo siapo yang den tak minat J.D Short, John Meyer .B. Brothers, Muddy Water dan banyak lagi termasuklah yang di Malaysia. Dah semesti eii... Blues Gang.

Pasal baru nak mula den tulis sikit lu, kalau ado maso den sambung kita bincang soal lain pulak cam isu politik, isu semasa dan sebagai eiii... den raso den taklah jumud bonar dalam pemikiran mungkin ado yang boleh kito bincangkan.